PLAYLIST-ის საიდუმლო

17838490მიშელ ფალკოფის PLAYLIST-ის საიდუმლო იმთავითვე საინტერესო იყო ჩემთვის, როგორც მელომანისთვის. ერთი სული მქონდა, ხელში ჩამეგდო და გადამეფურცლა.

წიგნი თავებადაა დაყოფილი, თითოეულ თავს სათაურად სიმღერა აქვს წამძღვარებული.

სხვანაირად არ შემეძლო და სანამ წიგნს ჩავიგდებდი ხელთ, ინტერნეტში მოვიძიე ზ.ა. Playlist – იდან ყველა სიმღერა, გადმოვწერე და შესაბამისი თავების კითხვისას ფონად მქონდა ჩართული.

თავდაპირველად მეგონა, რომ სიმღერებში თავად იდო მინიშნებები. რომ ამ სიმღერებს მივყავდით უშუალოდ “დამნაშავესთან” – მისკენ, ვინც მთავარ მოქმედ გმირს, თინეიჯერ ჰაიდენს თვითმკვლელობისკენ უბიძგა. თუმცა,მუსიკალურ ნაწარმოებებში არ იმალება “ვიოლინოს გასაღები”.

სემი, ჰაიდენის მეგობარი ასრულებს რა გარდაცვლილი მეგობრის ანდერძს – მიჰყვება მის მიერ დატოვებულ მინიშნებას – “მოუსმინე და ყველაფერს მიხვდები!” სიმღერების ფონზე ცდილობს გამოიკვლიოს საუკეთესო მეგობრის, ჰაიდენის სუიციდის მიზეზი.

ეს მიშელ ფალკოფის სადებიუტო რომანია. ის ცოტ-ცოტა ყველაფერს ეხება: მეგობრობას, სიყვარულს, ოჯახის წევრებთან ურთიერთობას, დანაკარგს, მრისხანებას, შურისძიებას, საკუთარი თავის ძიებას. ამ ყველაფერს კი თანამედროვე ახალგაზრდობის პრობლემებთან მივყავართ.

ეს არის გულწრფელი წიგნი, რომელიც ნათლად ასახავს თინეიჯერების პრობლემებს, იმას, თუ რა მარტივად შეიძლება ადამიანი მივიყვანოთ სასოწარკვეთამდე და ვუბიძგოთ საშინელი ნაბიჯის გადადგმისკენ.

წიგნის ამოცანაა – ადამიანებს დაანახოს ის, თუ რა დღეში შეიძლება ჩავაგდოთ დაუფიქრებელი გადაწყვეტილების მიღებით ის პირები, რომელთაც ძლიერ ვუყვარვართ. როგორ უნდა დასძლიო საყვარელი მეგობრის სიკვდილით გამოწვეული ტკივილი, მაშინ, როცა მიგაჩნია, რომ ამაში მცირეოდენი წვლილი შენც მიგიძღვის. შეგეძლო შენი მოქმედებით აგერიდებინა ლეტალური შედეგი, მაგრამ ამისათვის არაფერი მოიმოქმედე…

როგორ უნდა იცხოვრო ამ მძიმე ჯვართან ერთად?! – ამ ყველაფერზე პასუხს მიშელ ფალკოფის Playlist – ის საიდუმლოში იპოვნით.

ავტორი – მიშელ ფალკოფი

GOODREADS

Advertisements

პალიტრა L – გამომცემლობა, რომელიც ზრუნავს ჩემზე

პალიტრა L – ეს არის გამომცემლობა, რომელსაც როგორც გამცნეთ, მინდა განსაკუთრებული მადლობა გადავუხადო. ეს არის გამომცემლობა, რომელიც ზრუნავდა ჩემს საშვებულებო, უფრო მეტიც – თაფლობის თვის განწყობაზე და არა მხოლოდ.

ყველაფერი კი იმით დაიწყო, რომ ერთ დღესაც პალიტრა L-ის ანგელოზი გამომეცხადა და ჩემს ცხოვრებაში ახალი ერა დაიწყო.
მას შემდგომ გაფაციცებით ველოდები მის გამოჩენას, რამდენადაც ის ჩემთვის ერთ-ერთ ყველაზე ძვირფასთან, წიგნებთან და აქედან გამომდინარე, სასიამოვნოსთან ასოცირდება.

ქვემოთ ჩამოთვლილთაგან შეგიძლიათ იხილოთ დასახელებული გამომცემლობის მარგალიტების ჩემეული მიმოხილვები. რომელი ნაწარმოებიც არ იქნება “გალინკული” – იმის წაკითხვის ბედნიერება ჯერ კიდევ წინ მაქვს.

სხვადასხვა სერიიდან:

Liberteens:

საქართველოს ილუსტრირებული ისტორია:

მე(ც) აქ ვიყავი

ბოლო პერიოდში გეილ ფორმანი და მისი წიგნები საქართველოში დიდი პოპულარობით სარგებლობენ. ეს ალბათ, “გამომცემლობა პალიტრა L”-ის დამსახურებაა, რადგანაც, ქართველ მკითხველს მისცა საშუალება გასცნობოდა აღნიშნულ ავტორს.

I Was Here“მე აქ ვიყავი” – კიდევ ერთი წიგნია სერიიდან LiberTeens.  ეს არის ნაწარმოები მეგობრობაზე, სიყვარულზე, ურთიერთობებზე, პატიებაზე.

მიტევება ყველაზე რთული რამაა ამ ცხოვრებაში. განსაკუთრებით ჭირს საკუთარი თავის პატიება.

What If  – ესაა კითხვა, რომელიც არ ასვენებს მთავარ მოქმედ გმირს და რომელსაც ყოველი ჩვენგანი დღემუდამ ვატრიალებთ გონებაში.

რა იქნებოდა, ასე რომ არ მოვქცეულიყავი? რა იქნებოდა ისე რომ მომხდარიყო?

არ შეიძლება საკუთარი ცნობიერება აწვალო მსგავსი აკვიატებული აზრებით. არ შეიძლება სინდისი დაიმძიმო იმ ბრალით, რომელიც შენი არ არის! მოსახდენი აუცილებლად მოხდება და შენ ამას ხელს ვერ შეუშლი.

ერთადერთი, რაც ჩვენს ძალებს არ აღემატება და უნდა გავისიგრძეგანოთ, გარშემომყოფთ სიყვარულია და უნარია ამ სიყვარულის გამოხატვის. ადამიანებმა რაც შეიძლება ხშირად უნდა ვუთხრათ ერთმანეთს, თუ როგორი ძვირფასები ვართ ერთ-ურთისთვის.

სხვადასხვა სიტყვით გადმოცემულს, მაგრამ ასეთი სათქმელის მქონე წიგნის კითხვას არასდროს დავიზარებ, რადგანაც, ერთი საკმარისი არაა… შეხსენებაა საჭირო! შეხსენება იმის, რომ ცხოვრება მეტისმეტად მოკლეა სისულელეებზე ჩხუბისა და გაბრაზებისთვის და რაც დრო გვაქვს, მხოლოდ სიყვარულს უნდა დავუთმოთ!

“მეც აქ ვიყავი” – კოდისთან, მთავარ მოქმედ გმირთან, რომელიც საკუთარ თავს ვერ პატიობს ბავშვობის მეგობრის, მეგის თვითმკვლელობას.

მას შემდგომ, რაც გარდაცვლილის უმცროსი ძმა, სკოტი დის საუკეთესო დაქალს მისცემს მინიშნებას მეგის გამოსამშვიდობებელი წერილის ერთ-ერთი ფრაზის შესახებ, გოგონა გამოძიებას იწყებს. ვინ შეიძლება დახმარებოდა მეგობარს თვითმკვლელობის დაგეგმვაში?

წიგნი უაღრესად საინტერესოა. “კოხტა და დახვეწილი” – ის სიტყვებია, რომელიც უხდება როგორც სიუჟეტს, ისე თავად ავტორს.

მოკლედ, მეტს არ გავაგრძელებ და სანამ მე გეილ ფორმანის სხვა ნაწარმოებებს ჩავუჯდებოდე, თქვენ ამ რომანით ისიამოვნეთ.

ავტორი – ლორენ ოლივერი

Gayle-Forman

GoodReads

ლორენ ოლივერის – “დელირიუმი” – ანუ, სამყარო სიყვარულის გარეშე

“Love, the deadliest of all deadly things: It kills you both when you have it and when you don’t.”

ოდესმე თუ გიფიქრიათ, როგორი იქნებოდა ცხოვრება სიყვარულის გარეშე?

ნებისმიერ შემთხვევაში, როგორიც უნდა იყოს თქვენი პასუხი, შედეგი ერთია – ეს (წიგნში აღწერილი) სწორედ ის სამყაროა, რომელიც იარსებებდა ადამიანებს ერთმანეთის სიყვარულის უნარი რომ არ გვქონოდა.

დისტოპიური რომანი მოეწონება ყველას, ვისაც მოსწონს “შიმშილის თამაშები”, “ლაბირინთში მორბენალი” და მსგავსი ტიპის ნაწარმოებები ალტერნატიული რეალობის შესახებ.

Deliriumრამდენიმე დღის წინ ჩემს მეექვსე კლასელ დას თავისუფალი თემა ჰქონდა დასაწერი წიგნების შესახებ. ერთ-ერთი ფრაზა, რომელიც მოაკვარახჭინა, ასე ჟღერდა: “ყოველი ახალი წიგნი განსხვავებული სამყაროაო.” მეც ასე, ვმოგზაურობ ერთიდან მეორეში. აქამდე “ნამოგზაურებ” ქვეყნებს შორის დელირიუმთან ყველაზე ახლოს მაინც მარგარედ ეტვუდის – “მხევლის” სამყარო იყო (ამავე მწერლის რომანიდან – “მხევლის წიგნი”). აქაც, მთავარი მოქმედი გმირის სამშობლო იმდენად რეალურია, რომ გეგონება, აგერ “ყურის ძირში”, რამდენიმე კილომეტრში სასაზღვრო გამშვები პუნქტის გადალახვის შემთხვევაში უპრობლემოდ მოხვდები მაგდალენასთან. მაგდალენა, იგივე ლენა  ემზადება ოპერაციისთვის, რომელის შემდგომაც ცხოვრებას მშვიდად და უშფოთველად გააგრძელებს – იმის გარანტიით რომ არასდროს შეეყრება დაავადება “ამორ დელირია ნერვოზა” – ანუ – სიყვარული.

წიგნი მარტივად, ერთი ამოსუნთქვით იკითხება. ავტორს თვალნათლივ და ცხადად აქვს აღწერილი ყოველი სცენა. ალაგ-ალაგ სასაცილო, ალაგ-ალაგ სევდიანი.

ხანდახან ნერვები გეშლება, რომ ლენა მარტივ ჭეშმარიტებას ვერ ხვდება და ბრაზდები, რომ თვალებზე ლიბრი აქვს გადაკრული, მაგრამ – “მის დარაბებს მიღმაც მოვა გაზაფხული” კი არა და სიყვარული და…

…და სიამოვნებით მოგიყვებოდით რა ხდება შემდგომ, თუმცა, არ მინდა დაგისპოილეროთ…

უნდა აღინიშნოს, რომ ძალიან მომწონს წიგნების სერია “LiberTeens”, საერთოდაც, სადღეისოდ, გამომცემლობები ძლიერ აქტიურობენ, რაც ძალიან მახარებს და ჩემს წისქვილზე ასხამს წყალს.

მინდა განსაკუთრებული მადლობა გადავუხადო ყველას, ვინც ჩვენთვის, წიგნების მოყვარულთათვის ასე იღწვიან!

თუ შეამჩნიეთ, ჩემი ბოლო რამდენიმე სტატია “პალიტრა L” – ის გამომცემლობის წიგნებს ეხება. განსაკუთრებული მადლობა სწორად მათ მსურს გადავუხადო, თუ რატომ, ამას ოდნავ მოგვიანებით გაგიზიარებთ.

ავტორი – ლორენ ოლივერი

GoodReads